Честа да го започнат поставувањето на камен темелникот ја имаа градоначалникот Александар Петрески и претседателот на Одборот за изградба на споменикот, Јоне Станковски, а на чинот присуствуваа и претставници од локалната самоуправа.
– По изминати 20 години, со поставувањето на ова спомен обележје, во целост се реализира идејата на академик Цветан Грозданов- на охридскиот плоштад да бидат поставени трите споменици, на Свети Кирил и Методиј, свети Климент и Свети Наум . Ние како локална самоуправа ги донесовме сите потребни одобренија за поставување на споменикот, а министерството за култура финансиски ја подржа идејата. Академик Томе Серафимоски направи грандиозен споменик , кој по квалитет и големина не се разликува од спомениците што ги ставаат во Скопје, но чини многу помалку пари, рече Петрески.
Изработката на споменикот е завршена и тој се наоѓа во леарницата “Јеремиќ” во Белград, каде беше излеан.
– На 29- ти јуни споменикот ќе пристигне во Охрид, а најдоцна 2 јули ќе биде поставен на постаментот. Свеченото откривање ќе се случи на летниот празник Свети Наум, на 3 јули. На добра волја на скулпторот, академик Томе Серафимоски, со излеаниот споменик од Белград ќе стигне и гипсената фигура врз чиј примерок беше правен споменикот. Гипсената фигура ќе биде подарок за општина Охрид и најверојатно ќе биде поставена во комплексот Св Наум, информира Станковски.
Споменикот на Свети Наум Чудотворец, заедно со постаментот, е висок пет метри. За неговата изработка ќе бидат платени 160. 000 евра.
