Повеќе од 20 винарии и други учесници од Македонија од повеќе различни региони ќе бидат дел од годинешниот Охридски фестивал на виното. Оваа година како учесници ќе се претстават секому добро познатите големи вински брендови и компании, како и некои од помалите винарии, информираат организаторите.
Од сортите на вино фестивалот ќе понуди многу бели сорти на вина како: Темјаника, Траминец, Сувињон Бланк, Шардоне, македонската сорта Смедеревка, Виоњер, Ризлинг, Ркацители и многу други. За љубителите на црвените вина пак, ќе може да се пробаат многу голем број на вински сорти, помеѓу кои: несротливиот Вранец, Каберне Сувињон, Мерло, Мускат Отонел, Пино Ноар, Шираз, Картошија, Каберне Франк, Станушина, и др. Дополнителни ќе има розе вина, како и куве варијации и специјални рецепти на македонските винарии, потенцираат.
Велат важно е да се напомене дека нашите македонски вина се меѓу најквалитетните вина во Европа и особено на Балканот, а потврда за тоа е неодамнешниот Балкански интернационален натпревар оддржан во Софија каде нашите винарии со своите вина освоија 109 златни, сребрени и бронзени медали, како и престижната награда – најдоброто од шоуто/Best Of Show.
На фестивалот покрај квалитетните македонски вина, ќе можат да се дегустираат и француски вина. Ќе има вина за сите вкусови, длабоки црвени барикирани вина, како и лесни бели и розе летни вина со овошни ноти. Во историскиот центар на Македонија – Охрид кој дава добра подлога за убави летни вински приказни, дојдете да испишеме историја и да се забавуваме во престојните фестивалски денови, порачуваат организаторите.
Охридскиот вински фестивал ќе се одржи од 22 до 24 јуни на Кеј Македонија на платото пред хотел Палас. Фестивалот е организиран од Крафт Продукција, а под покровителство на Општина Охрид.
OhridNews
