Министерството за здравство соопшти дека согласно извештајот на Институтот за јавно здравје кој се однесува на периодот од 26 октомври до 1 ноември, тестирани се вкупно 17.299 материјали во лабораториите во кои се спроведува молекуларно тестирање за присуство на SARS-CoV-2, што претставува зголемување од 23,6 отсто во однос на претходната недела.

Регистрирани сe 5.800 нови позитивни случаи од 35 градови во државата со зголемување од 70,1 отсто споредено со неделата претходно. Најголем дел од регистрираните случаи и натаму се од Скопје (n=2.690; 46,4 отсто), каде е забележана и највисока неделна инциденца – 435,5/100.000.

Во наведениот период, процентот на позитивни од тестирани лица изнесува 33,5 отсто.

Пријавени се 88 смртни случаи од 21 град, зголемување од 4,8 отсто во однос на минатата недела. Oд нив, 70 лица биле над 60 години, 12 лица на возраст од 50 до 59 години, четири смртни случаи се пријавени од возрасната група од 40 до 49 години и по еден во возрасните групи од 30 до 39 години и 20 до 29 години. Од смртните случаи, епидемиолошки се истражени 81 или 92 отсто.

Регистрирани се заболени лица во сите возрасни групи. Најзастапена е групата лица на возраст од 30 до 39 (n=1283, 22,1 отсто). Голем број на заболени се регистрира и кај лицата во возрасните групи од над 60 години (n=1169; 20,2 отсто), од 40 до 49 години (n=1089; 18,8 отсто), од 50 до 59 години (n=1056; 18,2 отсто) и од 20 до 29 години (n=866; 14,9 отсто). Најмал број е регистриран кај децата на возраст до девет години (n=94; 1,6 отсто) и од 10 до 19 години (n=243; 4,2 отсто).

Во однос на дистрибуцијата по пол, пријавени се 2.793 (48,2 отсто) лица од женски и 3.007 (51,8 осто) од машки пол. Од случаите, епидемиолошки се истражени 839 или 14,5 отсто.

По добиени два негативни теста за присуство на Ковид-19 или со употреба на новиот алгоритам, како оздравени се водат 2.262 лица кои биле хоспитализирани или на домашно лекување, 696 повеќе во однос на претходната недела.

Угостителските објекти ќе работат до 21 часот, се забранува и групирање на повеќе од четири лица по 21 часот

Владата на денешната седница донесе одлука за скратување на работното време на угостителските објекти до 21 часот, како и одлука за забрана на групирање на повеќе од четири лица на јавен простор по 21 часот. Се препорачува граѓаните по 21 часот без поголема потреба да не се движат на јавен простор.

Владата на денешната седница донесе одлука за нови мерки за спречување на ширењето на коронавирусот: се скратува работното време на угостителските објекти до 21 часот, освен за достава и шалтерска продажба на храна. Оваа одлука важи и за угостителските објекти на бензинските станици , а исклучени се угостителските објекти на ТАВ аеродромите во Скопје и Охрид, напиша премиерот Зоран Заев на својот фејсбук профил.

Тој додава дека на седницата била донесена и одлука за забрана за групирање на повеќе од 4 лица на јавен простор после 21:00 часот.

Владата усвоила и препорака за сите домашни и странски граѓани на територијата на Северна Македонија, после 21 часот да не се движат на јавен простор доколку немаат важни и неопходни потреби.

OhridNews