Од охридскиот Народен театар за утре, 19- ти февруари, ја најавуваат претставата „ Стари Времиња“ според текст на Харолд Пинтер, во режија на Нела Витошевиќ, која премиерно беше изведена на фестивалот „ Охридско лето“ и „ Ристо Шишков“ во Струмица.
– Ги повикувам сите кои не успеаја да ја видат претставата да дојдат сега на едно убаво драмско задоволство кое трае 59 минути, рече раководителот на Народен теаатар Охрид и директор на Центарот за култура, Горан Стојаноски .
Во претставата играат Ирена Ристиќ, Јасмина Билаловиќ и Горан Стојаноски. Претставата репризно ќе биде изведена и во сабота, 20- ти февруари.
Претставата „ Стари времиња“ ќе го означи почетокот на новата театарска сезона на охридскиот театар, за кога се најавуваат четири нови проекти.
– На 25 февруари стартуваме со една интересна копродукција, проект кој го нарековме „ Импровокација“, а во меѓувреме се реновира долната подрумска сцена. Тројца актери Никола Тодороски, Стрезо Стаматоски и Филип Кипроски ќе прикажат нешто што е доста забавно и несекојдневно. Околу 28 февруари очекуваме премиера и на детската претстава „ Убавицата и ѕверот“ од Ѓорѓи Ризески, а на 5- ти март ќе следи и авторски проект на Никола Тодороски, информира Стојаноски.
Стојаноски најави и премиера на претставата „ Парламентарки“ и на претстава- комедија која ќе се игра на одбележувањето на 5 годишнината од формирањето на Народен театар Охрид.
Т. К.
