– Економските можности и самиот буџет покажуваат дека станува збор за скромност, па се приспособивме на големата светска криза за да направиме програма што ќе е соодветна на овој јубилеј, рече Васил Зороски, В. Д. Директор на фестивалот.
Како што е познато, Фестивалот ќе биде отворен во Античкиот театар со Рускиот национален оркестар, на кој солист ќе биде Симон Трпчески, а под диригентска палка на Михаил Плетњов од Русија.
Според претседателот на Управниот одбор, Зоран Велјаноски, програмата е соодветна за јубилејот. – Управниот одбор ја усвои програмата и смета дека таа е достојна за педесеттиот јубилеј на фестивалот. Сето тоа е во рамките на годинашниот буџет, односно во рамки на средствата со кои располага фестивалот – рече Велјаноски.
Најмногу учесници од странство ќе има во музичкиот дел од програмата. Ќе настапат музички уметници од Русија, Словенија, Египет, Австрија, Франција. – Јубилејот не обврза ова фестивалско издание да протече во знакот на ретроспективата. Се надевам дека преку фестивалот, Охрид и годинава ќе биде духовен центар – рече Јосифова-Неделковска, музичкиот селектор на Охридско лето.
Во театарскиот дел, годинава, ќе има само една премиера, а тоа е претставата „Хамлет“ на Драмскиот театар, а во режија на Дејан Пројковски. Таа ќе биде изведена на 16 јули во Центарот за култура „Григор Прличев“.
– Драмската програма ја нарековме Театарски реминисценции. Секоја претстава што доаѓа на ова издание ќе биде некако поврзана со тоа што се случувало досега, со режисерски имиња, актерски имиња, претстави и продукции што на некој начин придонеле Охридско лето да биде голем фестивал – рече Ѓорѓи Јолевски, драмскиот селектор на фестивалот.
Охридско лето годинава ќе понуди 25 концерти, 13 театарски претстави, една балетска претстава и еден оперски гала-концерт. Локации на изведби ќе бидат Античкиот театар, црквата „Св. Софија“, Долни Сарај, „Св. Јован Канео“ и Центарот за култура „Глигор Прличев“. До крајот на фестивалот публиката ќе може да проследи настапи на солисти и дуо-состави и 10 концерти на оркестри и камерни состави.
