Магичниот езерски предел кој се протега во прегратките на планините, многуте ретки видови птици и животни од кои голем број се единствени и во светот, ја изразуваат посебноста на преспанскиот регион, беше истакнато на изложбата посветена на Малото и Големото Преспанско Езеро, што денеска беше отворена во Информативниот центар на Националниот парк „Галичица“ во Стење. На неа беа изложени видовите риби кои живеат во овие езера.
Рибната фауна претставува едно од главните карактеристики на Преспанските езера, пред се поради нејзината единственост. Во Малото и Големото Преспанско Езеро живеат 23 видови риби, од кои девет видови се ендемски, што значи се наоѓаат само тука и никаде на друго место во целиот свет. Поради тоа се заштитени од Европската и националната легислатива. Оваа едниствена рибна фауна воедно го класифицира Преспанските езера меѓу десетте најважни водни живалишта во Медитеранот.
Изложбата со наслов “Богатството на нашите езера” цели да укаже на особеностите на рибната фауна во Преспа и да ја истакне каталитичката улога на човекот во нејзиното одржување. Рибарите, одгледувачите на добиток, земјоделците, научниците, посетителите, корисниците на езерото (во поширока смисла), треба не само да ги познаваат аспектите на ова природно богатство во регионот, туку и целисходно да придонесуваат кон зачувувањето на истото. А за да ги сочуваме рибните видови, пред се, треба да обезбедиме добра состојба на нашите езера, велат од Нционалниот парк „Галичица“.
OhridNews
