Наредните два дена во Вевчани ќе престојуваат претседателот на Српската академија на науки и уметности, академик Никола Хајдин и академик Владо Камбовски, претседател на МАНУ.
Нивни домаќин ќе биде градоначалникот на општина Вевчани, Цветомир Угриноски, а гостите ќе престојуваат во спомен- куќата на познатиот научник и доктор по физика Михајло Пупин, чие семејство ја изградило куќата во далечната 1880 година, по преселувањето од Москополе- Албанија.
– Двајцата академици веќе го потврдија своето доаѓање во Вевчани, а од наша страна како домаќини ќе направиме се за нивниот престој да биде што попријатен. Ваквите посети на видни гости се чести во Вевчани. Неодамна, академик Владо Камбовски престојуваше со членови на МАНУ, вели градоначалникот на Вевчани, Цветомир Угриноски.
Тема на разговорите на претседателите на македонската и српската академија на науки и уметности, ќе бидат научните достигнувања на познатиот научник.
Спомен куќата на Пупин за јавноста беше отворена во 2008 година, како сместувачко-угостителски објект со музејска поставка за неговиот живот и дело.
OhridNews
