Во врска со последниот настан во Слупчане, кога делегација предводена од министерсот за одбрана Фатмир Бесими, а во која имаше и униформирани претставници на АРМ, се поклони пред споменикот на паднати припадници на ОНА, претседателот на Република Македонија, д-р Ѓорге Иванов, оценува дека не биле испочитувани институционалните правила и процедури.
Униформираните лица во придружба на Министерот за одбрана, не се во формацискиот состав на Армијата на Република Македонија, туку членови на Кабинетот на министерот, се вели во соопштението од Кабинетот на претседателот.
-Претседателот Иванов побара од надлежните расветлување на случајот и утврдување на постоење на злоупотреба на службената должност. Исто така, претседателот бара од сите фактори да не ја злоупотребуваат Армијата на Република Македонија и употребата на армиската униформа за политички, партиски, или какви било други цели, стои во соопштението.
Според министерсот Бесими, положувањето цвеќе на споменикот на загинатите припадници на ОНА во Слупчане, претставува чин на помирување во духот на Охридскиот рамковен договор кој е составен дел од Уставот на Република Македонија.
Реагираше и Генералштабот на армијата, од каде информираат дека министерот за одбрана не се координирал со армискиот врв во врска со настанот во Слупчане.
OhridNews
