Тоа е најновата претстава на битолскиот театар, според текст на Еврипид и Хајнер Милер, а во режија на хрватскиот театарски режисер Нада Кокотовиќ.
– Среќна сум што работам за прв пат во Македонија и тоа претстава со која ќе го затвориме фестивалот охридско лето. Хајнер Милер е еден од моите најомилени драмски писатели, и затоа веќе имам направено неколку претстави според негови текстови. Тоа е писател кој дава големи можности при подготвување на претставите, изјави режисерот Кокотовиќ.
Вечерашната претстава ќе биде изведена на просторот на Античкиот театар, но со една поразлична сценографија- актерите ќе играат на просторот наменет за публиката, која пак ќе има прилика претставата да ја проследи седејќи на сцената.
– Бев на отварањето на 12 јули, и тогаш ми дојде идејата за тоа публиката да се наоѓа на сцена. Пред се, затоа што и не е потребно да присуствува голем број публика, затоа што Медеја е една интимна драма, а и гледалиштето е идеален простор за изведбата на актерите, рече Кокотовиќ.
Во претставата главната улога на медеја ја игра актерката Јулијана Мирчевска.
– Од секогаш сум сонувала да ја играм улогата на Медеја. Ме фасцинира текстот на Милер, и работата со режисер како Кокотовиќ кој знае прецизно да те води низ претставата, изјави Мирчевска.
Во претставата Медеја се говори за односот на мажите и жените, љубовта и омразата, органското и разумското, новото и старото,бесот и резигнацијата. Медеја говори за светот во којшто живееме, за светот за кој или против кого треба да се бориме.
Претставата почнува во 21 часот на Античкиот театар.
