Како што велат актерите, станува збор за драмска претстава со траги- комична содржина, обработувајќи го животот на децата бегалци од Егејска Македонија, прикажувајќи ги емоционалните патешествија преку сеќавањата на главниот лик, и самиот дете бегалец, кој сега се наоѓа во Дом за стари лица, повторно преживувајќи ги моментите од детството и патот од Егејска Македонија до далечната Австралија.
Вечерашната изведба е дел од турнејата низ Македонија, а претходно таа се прикажуваше во Кочани, Битола, Куманово, Штип и Струмица, а ќе биде дел и од програмата на фестивалот Војдан Чернодрински во Прилеп.
– Задоволни сме од реакциите на публиката низ градовите во Македонија, како и од публиката во Австралија каде ја дававме претставата 11 пати пред да дојдеме во Македонија. Луѓето од претставата излегуваат со насолзени очи и задоволни што токму оваа тема ја обработуваме во драмата, особено сега кога е актуелен грчко- македонскиот спор со името, вели Душан Ристевски, кој е дел од актерската екипа на театарот од Сиднеј.
Во претставата играат: Васко Србиноски, Соња Зенговска, Пецо Зенговски, Митра Недановска-Нешковска, Стефо Нанцу, Татјана Тодороска, Спасиа Огненовски, Илдико Каса, Јасмина Зенговска, Душан Ристевски и Јован Ристевски.
Сценариото е на Стефо Нанцу и Душан Ристевски, а продуцент е Зоран Лозевски. Претставата е во режија на Стефо Нанцу.