Охриѓанецот  М.С.(65), поранешен директор на АД ,,Бетон,, од  Охрид  е во 30 дневен притвор, поради основано сомнение дека е сторител на  кривичните дела: “Проневера во службата, Злоупотреба на службената положба и овластување и Предизвикување стечај со несовесно работење”.

Пријавениот, во својство на Директор на АД “Бетон” Охрид во период од 2005 до 2007 година, со пречекорување на службената должност, ја оштетил фирмата, за сума од 21.818.156  денари, затоа што пропуштил да ги наплати на лице од Охрид, на име комуналии, извршени градежни работи, земјиште за објект, проекти и користени материјали. Во истиот период, пријавениот, иако знаел дека АД “Бетон” е неспособен за плаќање, со неразумно трошење на имотот и оттуѓување на предмети и права по несразмерно ниски цени и преќутно обновување на договори со други лица и без да оствари побарувања, извршил повреда на службените должности и во текот на 2009 година  предизвикал стечај на фирмата.

Исто така пријавениот, во периодот од 2005 до 2007 година, со намера да се здобие со противправна имотна корист, присвоил 1.009.000 денари доверени во службата. Тој во текот на мај 2006 година, врз основа на склучен договор за купопродажба на недвижен имот кај месноста “Елен Камен”сопственост на АД “Бетон”  од лице од Струга, со записник и каса-прими,наплатил 4.284.000 денари кои не ги евидентирал во благајната на фирмата. Наместо тоа,  пријавениот во периодот од 2006 до 2008 година, во 7 наврати со 7 каса прими документ, уплатил вкупно 3.275.000 денари, со што за себе го присвоил износот од 1.009.000 денари.

OhridNews
Извор:”СВР-Охрид”