По бројните кражби во дел од црквите во охридско и струшко, деновиве извршена е кражба и во црквата Свети Атанас во ресенското село Долно Перово, при што се одземени пет икони.
Како што информираат од министерството за внатрешни работи, украдените икони предходно биле регистрирани во Заводот за заштита на културни споменици. При тешката кражба одземени се и 7.000 денари кои биле оставени во црковната каса.Тешката кражба е извршена на тој начин што сторителите со употреба на погоден предмет насилно ги искршиле двата катанци од влезната врата на црквата, влегле внатре, ги одзеле горенаведените предмети и пари и незабележани од никого го напуштиле лице местото.
Оваа кражба е само една од низата кои се случуваат во црквите низ земјава. Во изминатите три години од црквите во струшко се украдени 70 икони. Вредни предмети исчезнаа и од дел од црквите во Охрид и охридско.
Според информациите од Управата за заштита на културното наследство од земјава досега се однесени преку 20.000 вредни икони, артефакти и други исклучително значајни сакрални предмети.
