Министерството за локална самоуправа и Делегацијата на Европската унија во земјава во Охрид ќе го промовираат почетокот на два нови проекти финансирани преку Програмата за прекугранична соработка, како и потпишувањето на договорите за кофинансирање на тие проекти со Министерството за локална самоуправа.
Овие проекти промовираат одржлив регионален развој, заштита на животната средина и безбедност на заедницата, засилувајќи ја соработката во рамките на локалните заедници и преку границата. Тие, исто така, имаат за цел да ги зајакнат регионалните капацитети за одржлив развој на туризмот. Вкупната вредност на проектите надминува 1,6 милиони евра.
На промоцијата е предвидено присуство на министерот за локална самоуправа Златко Перински, амбасадорот на ЕУ, Михалис Рокас, директорката на Директоратот за конвергенција и кохезија со ЕУ на Албанија, Еридана Чано, како и градоначалниците на Охрид и на Крушево, Кирил Пецаков и Нико Чонески.
Програмата за прекугранична соработка Северна Македонија – Албанија е една од петте програми во кои Северна Македонија учествува со своите соседни земји. Целта на програмата е унапредување на прекуграничната соработка и поттикнување на регионален развој. Овој пакет на средства од ЕУ во износ од околу 12 милиони евра, е наменет за поддршка на проекти што промовираат економски раст, еколошка одржливост и социјална интеграција во двете земји.
OhridNews
