Монографијата посветена на црквата Четириесет Севастиски Христови маченици, ќе биде промовирана во недела во музеј куќата „Робевци“ во Охрид.
Оваа монографија прва од ваков вид на балканските простори содржи информации од првите археолошки истражувања па се до денешниот изглед и конзервација на црквата. Во неа се поместени фотографии и информации за целокупниот откриен археолошки материјал и фрескоживописот на овој значаен сакрален објект.
Автори на книгата се археологот Владо Маленко, нумизматичарот Даница Бачева и историчарот на уметност Гоце Ангеличин – Жура.
Црквата Четириесет Севастиски Христови маченици во Охрид потекнува од средината XIII век и претставува историска алка помеѓу XII и XIV век. Таа е постара и од Св. Јован Канео и Св. Богородица Перивлепта и е една од најстарите цркви воопшто во Охрид. Црквата е изградена во времето на охридскиот архиепископ Димитри Хоматиjан кој е автор на краткото Климентово житие и архиепископ кој ќе го круниса епирскиот деспот Теодор Дука во црквата Св. Софија, а негов лик е пронајден и во пештерската црква Св. Еразмо.
Симболично промоцијата на ова значајно научно дело ќе се одржи на 21-март на празникот посветен на Четириесетте Севастиски Христови маченици.
