Најновата книга за деца “Ќерката на поетот” од охридскиот писател Тоде Илиевски, неодамна издадена од страна на издавачката куќа “Феникс”, ќе се најде меѓу делата кои ќе бидат промовирани на “Фестивалот на чајот и читањето”, кој од 4- ти февруари ќе започне во Скопје.
На годинешната, традиционална книжевна и културна манифестација предвидени се голем број промоции, трибини, разговори, средби со писатели, попусти на книги и слично. Меѓу другите содржини, ќе се извршат и промоции на романот “Лифтот (не) е за двајца“ од Христо Петрески, изборот со драмски текстови “За само еден ден“ од Трајче Кацаров, “Антологијата на јапонската хаику поезија“ од Петко и Наташа Дабески, како и новите книги од Јордан Плевнеш, Душица Илин, Панде Манојлов, Билјана Станковска, Луси Караниколова, Зоран Пејковски, Петко Шипинкаровски и други македонски автори.
За време на “Фестивалот на чајот и читањето“, ќе биде соопштена и одлуката за годинашниот добитник на меѓународното признание “Златен прстен“, кое се доделува за книжевен опус на истакнат автор од земјата и странство.
