Прва блокада во вода со СУП даски и пренасочување на бродови, глисери, скутери со цел почитување на на законската обврска за одалеченост од 300 метри од брег беше организира вчера во Охридско Езеро од страна на здружението „Стар Лагадин“, со поддршка од „Зелена народна стража“. Акцијата продолжи на брегот со масовно и гласно барање за безбедност и зачувување на езерото и крајбрежјето.

Организаторите велат дека се одлучиле на ваков чекор поради недоволната реакција на надлежните институции.

Вчерашниот перформанс и јавен собир во езерото и пред сомнително легализираниот хотел во Лагадин, имаше за цел да информира за сите нелегалности и да подигне свест кај народот кој се буди. Да ја заштитиме оваа единствена природа дадена од Бога, бидејќи наша одговорност е да ја зачуваме за следните генерации. Перформансот беше резултат на незадоволството на туристи и мештани. Блокадата во вода се однесуваше на законот за внатрешна пловидба член 13. и соодветните казни за непочитување на законот, вели Илина Арсова, претставник на здружението „Стар Лагадин“.

Организаторите прашаа дали треба да се случи трагедија за институциите да почнат да ги спроведуваат законите во езерото или на патот, изразувајќи при тоа и незадоволство и во однос на одлуката на УНЕСКО и продолжувањето на рокот уште 6 години во кој велат којзнае уште колку дивоградби ќе се легализираат.

Од протестот беа испратени повеќе барања како почитување на Законот за внатрешна пловидба, изрекување казни на прекршителите и обележување на границите на пловните патишта, означување на пешачки премини и поставување на знаци за регулирање на брзината на регионалниот пат на потег на сите населени места на Охридското крајбрежје, итно носење на просторниот план за Охридското крајбрежје и антикорупциска истрага за одговорните за пролонгирањето на оваа суштинска постапка за заштита на крајбрежјето и зачувување на УНЕСКО статусот, антикорупциска истрага за постапката за добивање градежна дозвола на спорниот хотел во Лагадин, како и рушење на сите дивоградби во подрачјето заштитено од УНЕСКО.

OhridNews