-Основни предуслови за развој на туризмот се спречување на натамошна урбана деградација на Охрид, прекинување на трендот на неконтролирирано проширување и понуда на станбен простор во општината, решени комунални инфраструктурни проблеми (посебно во изградба на канализационите системи, колекторскиот систем и водоснабдувањето), изградба на нова автобуска станица и доизградба на патната мрежа (посебно новиот пат Охрид-Св.Наум, во соработка со Владата на Република Македонија). Ова го истакна кандидатот за градоначалник на Охрид од ВМРО ДПМНЕ, Кирил Трендафилов Нанче на денешната прес конференција на која презентираше сегменти од својата изборна програма во делот на туризмот и културата.
Нанче кажа дека доколку стане градоначалник негови приоритетите ќе бидат промовирање на Охрид како туристичка дестинација и развивање на повеќе видови туризам: езерски туризам, алтернативен туризам (планинарење, параглајдерство, планински велосипедизам), конгресен туризам, културен туризам, екотуризам, рурален туризам, здравствено-рехабилитациски и спорстки туризам.
Трендафилов вети изградба на нови шопинг-центри,искористување на поволните климатски услови и чистата еколошка средина, како и селата и викенд населбите во развој на туризмот. Најви и продолжување на трендот на максимално користење на културното наследство во развој на туризмот и формирање на посебно туристичко друштво за промоција на Охрид како туристичка дестинација, кое би било во целост финансирано од локалната самоуправа, креирање туристички информатор со можност за онлајн букирање и искористување на IT технологијата во развој на туризмот.
Во доменот на културата Нанче вети: зачувување и промоција на богатото културно и историско наследство, изградба на нов музеј на градот; изградба на нова градска библиотека; формирање на професионален театар; изградба на концертна сала; изградба на комплексот Сценскиот простор Долни Сарај; уредување на платото кај „Св.Богородица Перивлепта“; реконструкција на Центарот за култура; возобновување на Светиклиментовиот универзитет на Плаошник со изградба на седиште на Охридската архиепископија, галерија на икони, конгресна сала и една од најголемите библиотеки на балканот; реставрирање и презентирање на фасадите на куќите кои се наоѓаат на најфреквентните улици во стариот дел на градот; целосно доистражување и конзервирање на цитаделата на Самоиловата тврдина, како и конзервирање на периметралниот тврдински ѕид; целосно доистражување и конзервирање на античкиот театар. И Негово ставање во функција на културните настани со изградба на потребните додатни содржини; поставување на споменици на значајни личности од историјата на Охрид и донесување на Закон за градот Охрид.
