Градоначалникот Константин Георгиески, денеска беше во обиколка на повеќе локации во општината каде се во тек градежни работи за реализација на значајни инфраструктури проекти.

Во Елшани во тек е реконструкција на покривот на училиштето, кој инаку е од азбест, а се врши и санација на потпорен ѕид. Во Коњско, исто така, се реконструира покривот на локалното училиште, но и улицата „Асном“ каде ќе има нов асфалт и две велосипедски патеки. Промена на покривот се врши и во училиштата „Христо Узунов“ и „Братство и Единство“ во Лескајца, информира градоначалникот Георгиески.

Георгиески посочи дека во тек е и санација на потпорен ѕид во непосредна близина на спомен куќата на Григор Прличев, а со тендер вреден 3 милиони денари ќе се санира и гради канализациона мрежа во Лескоец и Рача. Во почетна фаза е и реализацијата на проектот за реконструкција на плоштадот „Табана“. Во рамки, пак, на проектот кој се реализира преку Југозападниот плански регион се гради пешачката патека кај Саат кулата на охридското кале, дополни Георгиески.

Единствен проект кој не е започнат, а е со потпишан договор е пробивањето на улицата низ поранешната касарна, поради адмнинистративни пречки кои се отстрануваат, појасни Градоначалникот.

Георгиески во 2020 година најави повеќе значајни инфраструктурни проекти за кои се предвидени или ќе се предвидат средства во општинскиот буџет.

Идната пролет предвидена е комплетна реконструкција и обновување на влезот на Охрид од Битола, на потегот  од Здружение на возачи до почетокот на улица „15 Корпус“. Проектот е изработен и испратен до Агенцијата за патишта. Општината ќе ја изработи подземната инфраструктура, а државното јавно претпријатие асфалтирањето. – најави Георгиески.

За идната година најавена е и реконструкција на булеварот „Македонски Просветители“. Проектот е вреден 40 милиони денари, а најверојатно со него ќе се аплицира пред Светска банка која веќе одобри 1,9 милиони евра за инфраструктурни проекти во Охрид, рече Георгиески. Тој најави реконструкција и на улицата „Абас Емин“, која ќе се реализира со средства на Европската банка за обнова и развој и општината. Се очекува наскоро Министерството за транспорт и врски да го распише потребниот тендер и да отпочне постапката за ревитализација на оваа значајна сообраќајница која со децении чека на обнова. Следната година ќе се реконструира и плоштадот кај стариот Чинар.

Што се однесувца до изградбата на катна гаража кај пазарот. Георгиески рече дека во тек е постапка за експропријација на 90 метри квадрати од парцелата за оваа намена, по што ќе биде објавен Оглас за јавно приватно партнерство, согласно изготвената физибили студија.

Ohridnews