Ревитализиран дел од уништеното блато Студенчишта

Мал дел од уништеното Студенчишко блато е ревитализиран и вратен во првобитна состојба, што според експертите е добар знак дека овој природен феномен може да се заштити од целосно уништување. Со проектот што заеднички го реализираа Ohridnews и Македонското лимнолошко друштво, а со поддршка на Министерството за животна средина и просторно планирање,  се уреди простор од околу 1200 метри квадратни. Со расчистување на стотици кубни метри најразличен цврст отпад дел од деградираниот простор е ревитализиран, а таму веќе природно никна трска и други растенија карактеристични за охридското блато.

Во уредениот простор заштитен со дрвена ограда лимнолозите засадија автентични блатни растенија ,со што еден мал дел од блатото врз кој со години се натрупувал смет повторно е во функција на природата. 

Со проектот извршени се научни согледувања на сегашната состојба на блатото и живиот свет во него, а сознанијата на експертите се преточени во брошура која благодарение на проектот кој го поттикна Ohridnews, ќе бидат достапни за пошироката  јавност и тоа бесплатно. Граѓаните исто така ќе можат да ја посетат и ботаничката градина која се наоѓа во близина на дирекцијата на Комуналец каде можат да ја разгледаат блатната вегетација.

Овој проект е мал придонес на Ohridnews и Македонското лимнолошко друштво кон зачувување на преостанатото охридско блато, за чија целосна заштита е потребна поголема општествена акција. На прес конференција што ќе се одржи денеска ќе бидат соопштени резултатите од активностите и научни истражувања спроведени во рамки на проектот за заштита на блатото Студенчишта. Проектот кој целосно го финансираше Минисиерството за животна средина и просторно планирање, е поддржан и од локалната самоуправа.