Јунакот од последниот квалфикациски дуел голманот, Борко Ристовски се премисли и реши повторно да застане на голот на македонската ракометна репрезентација. По разговорот со генералниот секретар на Ракометната федерација на Македонија, Марјан Начевски, биле „надминати недоразбирањата“. Ристовски беше категоричен дека повторно ќе го облече дресот со државниот грб само ако се сменат некои работи во РФМ, а со таков став излезе по неодамнешното дерби со Вардар про, кога во самиот финиш имал вербален дуел со некој од службените лица.
Балканијадата ќе ја пропуштат само интернационалците Наумче Мојсоски од шпанскиот прволигаш Логроњес и Владимир Темелков од германскиот второлигаш Вилштат поради обврски кон своите клубови претстојниов викенд.
Македонија на Балканското првенство ќе стартува утревечер против Турција од 17,45 ч. во СРЦ „Кале“. В петок во истиот термин во Велес избраниците на селекторот Илиja Темелковски ќе ги одмерат силите со Србија, а в сабота во Скопје последен противник ќе им биде Босна и Херцеговина.
По пауза од 11 години репрезентативен ракомет ќе е игра и во Велес. Велес последен пат ја нагости македонската репрезентација против Словачка во 1997 година, но поради тоа што велешани тогаш ја исвиркаа химната 11 години во градот не гостуваше ниту една селекција на официјален натпревар.
