Опозицијата на Охрид му отстапи само две кандидатски места за пратеник во 5-та Изборна единица во која носител на листата на коалицијата предводена од СДСМ е Јани Макрадули. Од предложените осум кандидати на општинската организација, наместо очекуваните четири места, охридските социјалдемократи добија само едно. Митре Велјаноски, член на Извршниот одбор на партијата и актуелен раководител на секторот за образование и култура при општина Охрид е 4-ти на кандидатската листа за пратеници во Битолско-охридскиот регион. На листата има уште едeн кандидат од Охрид, Верица Хајба, познат туристички работник и актуелен член на Советот на општина Охрид од редовите на НСДП, која е 13-та.
Од Општинската организација на СДСМ по одлуката на 12-от Конгрес на партијата, што се одржа вчера во Скопје, засега нема официјален коментар, но истакнати партиски членови кои ги контактиравме се изненадени од одлуката на централата, дотолку повеќе што партијата е на власт во Охрид веќе втор мандат и имаше добри резултати на последните локални избори.
