Историчарот на уметност Гоце Ангеличин Жура, објаснува дека делото на Солунските браќа зазема исклучително место во македонската историја, дотолку повеќе што својата прва мисија светителите ја започнале токму од овие простори.
–По завршувањето на моравската мисија кога стигнале во Рим папата Адријан ги одобрил и признал нивните книги како и словенскиот јазик и наредил нивните дела да бидат ставени во олтарот на римската црква Санта Марија Маџоре. Тие биле застапници на идејата за универзална црква и затоа на 31 декември 1980 година папата Јован Павле Втори ги прогласува Светите Кирил и Методиј за сопокровители на Европа, објаснува Жура.
Иако Светите Кирил и Методиј никогаш не биле во Охрид во овие краишта постои силен култ кон нив, за што во голем дел се заслужни нивните ученици Климент и Наум. Тие од Охрид ја продолжиле мисијата за описменување на словенските народи, а нивните дела и по повеќе од 11 века силно се 
чувствуваат во древните светилишта на бреговите на Охридското Езеро, каде Наум и Климент изградиле манастири од каде ја проширеле писменоста се до Русија.
– Да не беше мисионерската дејност на продолжувачите, на Климент и Наум, не ќе беше ни големото дело на Кирил и Методиј. Кога тие продолжувачи дошле на овие простори тука бил развиен паганизмот, а Климент и Наум ги отфрлиле латинизмот, 
грцизмот и паганизмот и го воведуваат словенскиот јазик како универзален јазик.-објаснува Жура.
Охрид традиционално петта година по ред Денот на Светите Кирил и Методиј го одбележа со бројни манифестации. Делегација на општината, образовни и други установи положија цвеќе на споменикот на просветителите во центарот на градот, а на плоштадот се одржа свеченост на која на наградените ученици на државните и меѓународни натпревари им беа врачени пригодни подароци.
