Деновиве во образовниот систем на Општина Охрид се случи уште една тешка манипулација од страна на надлежните лица, само уште една во низата од многуте во последните 9 месеци, со која уште еднаш се покажа безидејноста, неподготвеноста и неспособноста на локалната власт од ВМРО- ДПМНЕ да ги менаџира потребите на учениците во училиштата, велат од општинската СДСМ.

– За да биде прекинат по секоја цена оправданиот бојкот на наставата во населба Рача, што настана како последица на „генијалната“ идеја во еден клас заедно да учат ученици од прво и петто оддление, надлежните лица се дрзнаа да им ветат на родителите од засегнатите првачиња дека проблемот со недостиг од наставен кадар ќе го решат со ангажман на наставник од страна на локалната самоуправа. Без согласност за вработување од Министерството за образование и наука, како и од Министерството за финансии, доколку се работи за ново финансирање, ниту едно училиште во Македонија не може да вработи наставен кадар, додаваат од ОО на СДСМ.

Оттаму прашуваат зошто локалната власт и директорката на ОУ „Григор Прличев“ Охрид упорно ги лажат и манипулираат родителите од подрачното училиште ,според кои законски одредби ќе биде вработен наставник во тоа училиште од страна на локалната самоуправа, како тој наставник ќе ја изведува наставата и кој ќе се потпишува во одделенскиот дневник и на свидетелствата на крајот од учебната година.

– Согласност за вработувања сите училишта бараат пред почетокот на секоја учебна година од надлежното министерство. Нејасно е зошто ОУ „Григор Прличев“, доколку побарало таква согласност за паралелката во Рача, не ја добило од министерството, имајќи го во предвид фактот што сега и централната и локалната власт во Охрид се во рацете на ВМРО-ДПМНЕ. Ова е само уште еден пример за тешките и несогледиви последици од самоволието на ВМРО- ДПМНЕ, кога во еден ден, пред почетокот на оваа учебна година, повеќе од 60 стручни и обучени наставници беа целосно неоправдано отстранети од воспитно-образовниот систем во општината, само поради политички реваншизам, велат од СДСМ.

Ги повикуваат инспекторите од просветниот и трудовиот инспекторат да им помогнат на родителите во Рача и како што велат, да го спречат самоволието на локалната власт и раководството на училиштето, за да не се случи учениците на крајот од оваа учебна година да добијат незаконски и нелегални свидетелства.

OhridNews