Локалната власт на ДПМНЕ во Охрид уште еднаш им покажува и докажува на граѓаните дека не поседува капацитет за домаќинско управување со Општината, велат од ОО СДСМ Охрид.
Градоначалникот Пецаков, додаваат, по втор пат пред советниците на Општина Охрид им предлага да усвојат програма со која ќе им дадат право и можност да отуѓи дел од градежното земјиште лоцирано во просторот на поранешната касарна.
Програма за располагање со градежно земјиште се носи еднаш годишно и тоа на почетокот на календарската година. Кога веќе не е донесена програма за оваа календарска година уште понејасно е зошто Пецаков инсистира истата да се донесе четири месеци пред крајот на оваа година или можеби на Пецаков доволно му се четири месеци да го отуѓи земјиштето. Програмите за располагање со градежно земјиште се носат врз основа на анализа и процена за долгорочен економски развој, а не врз основа на лични мотиви за расипничко однедување со јавниот имот, велат во соопштението од СДСМ Охрид.
Паралелно, велат, со намерата за отуѓување оваа локална власт издвојува 2 милиони и 6 илјади денари за изработка на Студија за технолошки-рекреативен развој на просторот во поранешната касарна.
Овој податок е дополнителна потврда дека локалната власт е конфузна и контрадикторна без визија и сенс за просперитет и развој. На каков технолошко-рекреативен развој ќе работи доколку го отуѓи земјиштето? Затоа го повикуваме градоначалникот Пецаков да ја повлече оваа точка од дневен ред како беспредметна и неоправдана. Истовремено упативаме апел до сите советници во Советот на Општина Охрид без разлика на нивното политичко убедување да немаат удел во расипничкото однесување на градоначалникот Пецаков, додаваат од ОО СДСМ Охрид.
OhridNews
