Во рамките на утврдената агенда за планираните предизборни активности, вчера во попладневните часови кандидатот за градоначалник Александар Петрески и кандидатите за советници од редовите на СДСМ Охрид ги посетија и остварија предизборни средби со жителите од 15-ти Корпус и Илинден. Во директен, отворен и непосреден разговор со присутните од овие две урбани заедници во Охрид беа презентирани приоритетите од изборната програма на СДСМ за претстојните локални избори, а се дискутираше и за сите отворени прашања и проблеми на жителите, како и за актуелните случувања
на политичката, економската и општествената сцена во општината и во државата.
Според утврдената агенда на Централниот изборен штаб на СДСМ вечерва со почеток во 20:30 часот на градскиот плоштад „Св. Климент Охридски“ СДСМ ќе го одржи својот централен изборен митинг во Охрид. На митингот ќе бидат претставени кандидатите за членови на општинскиот совет од советничката листа на СДСМ Охрид, а на присутните граѓани ќе им се обратат г-дин Зоран Заев, претседател на СДСМ, г-дин Александар Петрески, кандидатот од СДСМ за градоначалник на Општина Охрид и г-дин Љубомир Данаилов Фрчкоски, кандидатот од СДСМ за Претседател на Република Македонија.
