Деветти Мај се одбележува како Ден на Европа.
На овој датум во 1950 година се роди идејата за Европската, кога францускиот министер за надворешни работи Роберт Шуман во Париз ја прочита декларацијата со која ги повика Франција, Германија и останатите европски земји да ги здружат своите производства на јаглен и челик како „прва конкретна основа за создавање на европска федерација“. Трговската заедница набрзо стана Европска заедница, а денес Европска унија во која членуваат 27 држави.
Македонија поради добро познатиот спор за името наметнат од нашиот јужен сосед се уште е земја кандидат и го очекува датумот за официјално отпочнување на преговори за членство во Унијата. Во меѓувреме земјата и со унијата започна дијалог на високо ниво, кој е замена за официјалните преговори и своевидна подготовка за нивно отпочнување.
Денот на Европа ќе биде одбележан и во Охрид. По тој повод во организација на Сојузот на борците од НОВ од Општина Охрид и Општина Дебарца, денеска во месноста Раштани во Дебрца ќе се одржи пригодна свеченост пред споменикот на паднатите борци во НОБ „Кременатец“. Поздравна реч ќе одржи Гоце Георгиески – претседател на Општинската организација на Сојузот на борците од Народноослободителната и антифашистичка војна на Македонија 1941 – 1945 и на граѓани продолжувачи во општините Охрид и Дебарца, а на славното минато ќе се осврне Никола Стефаноски – потпретседател на организацијата. Учесниците потоа ќе маршираат до Белчишта каде ќе се одржи прием, а свеченоста ќе биде збогатена со културно уметничка програма.
