Со низа настани денес во Охрид и Скопје, Канцеларијата на УНФПА во Македонија и Ѕ-ПЕЕР Македонија – младинска мрежа од 20 невладини организации кои работат на унапредување на сексуалното и репродуктивното здравје го одбележуваат 12 Август – Меѓународниот ден на младите.

Централниот настан за одбележувањето на Светскиот ден на младите оваа година ќе биде во Охрид. Цел ден на плажите што младите најчесто ги посетуваат, активисти од Црвениот крст од Охрид поделени во три групи ќе делат кондоми и едукативни материјали за промоција на бесплатните советувалишта за сексуално и репродуктивно здравје за млади.

На плажата „Куба Либре“ во 12 часот концерт ќе одржи Y- PEER амбасадорот за Македонија – Дани Димитровска. Концертот ќе биде проследен со едукативно забавни активности за проверка на знаењето за ХИВ/СИДА на посетителите и вештините за правилна употреба на кондом.

Во Скопје, вечерва Културниот центар Креатив ќе се одржи Јавна дебата на тема Младински активизам- практики и препораки за подобрување на меѓуетничкиот дијалог.

Под мотото „Наша година, наш глас“ младите во целиот свет  ја прославуват интернационалната година на млади 12 Август 2010 – 12 Август 2011.

Како што информира Y- PEER Македонија, во рамки на интернационалната година на млади тие се фокусираат на потребата од воведување сексуално образование, иницијатива под слоганот „Сексуално образование во Македонија, кога ако не сега“.