– Охрид покрај урбанистичка и туристичка деградација, се соочува се повеќе и со еколошка деградација на ретките природни богатства заштитени со закон. Од година во година се стега обрачот околу Студенчишпкото блато. Внатре има и институција, како и обиди за градби. Ако се гледа однесувањето на локалната самоуправа кон блатото не е чудо ако наскоро не видиме тука и нацртани згради, бидејќи до надлежните не допира гласот на јавноста, медиумите и стручната јавност, вели Дејан Пановски од Министерството за животна средина.
Цел на интереси не е само Студенчишкото блато. Охрид години наназад е претворен во вистинско градилиште. Згради никнуваат на секоја слободна површина, а од градба не се поштедени ниту дворните места и парковите помеѓу старите станбени објекти. Од Асоцијалцијата на архитекти на Македонија забележуваат дека има недоволно јасни градежни зафати во Охрид за кои стручната јавност нема расправано и дека е потребна дискусија за да се донесе соодветно архитектонско решение.
– Охрид е град на УНЕСКО, што значи дека има посебен режим за користење на просторот и за заштита на природното и културното наследство. За тоа е донесен и нов закон, така да предуслови за едно дисциплинирано одлучување и обликување на просторот има, само треба да се почитуваат, вели Даница Павловска, претседател на Асоцијата на архитекти на Македонија.
Во моментов се проценува дека во Охрид има помеѓу 7 и 10 000 викенд станови. Дел од нив во лето незаконски се издаваат на туристи, со што се создава нелојлна конкуренција на легалните станоиздавачи, се менува структурата на туристите, но и демографската слика на градот за што најповиканите, надлежните институции на локално и централно ниво речиси и воопшто не дискутираат.
