Ракометарите на Охрид ја забележаа првата победа во шампионатот, откако со 21- 16 го совладаа тимот на Ѓорче Петров. Вообичаено, до триумфот охриѓани ги донесе цврстата одбрана искомбинирана со расположениот голмански двоец на голот.
Првиот дел го одбележаа малиот број на погодоци, неповрзаната игра и големиот број технички грешки. Во една таква игра, охриѓани благодарение на голманот Пецаков (11 одбрани) замина со позитива на одмор.
Нервозно влегоа охриѓани во вториот дел, а нивната нервоза дополнително се зголеми кога гостите стигнаа на минус еден 12-11. Во овој период “белите“ направија и три исклучувања со што сериозно ја загрозија предноста.
По играта на жица, домаќините се консолидираа, гостите не профитираа по играњето со човек, а на моменти и со два повеќе. Следуваа серија подгодоци на Трифуноски, Митрески и Андоновски , по што се врати безбедната предност од плус пет 19-14.
Рутинската игра на искусниот охридски тим не дозволи изненадување во последните десет минути од мечот. “Изборникот“ Андоновски во последните минути од мечот им даде шанса на младите ракометари кои допрва треба да покажат дека охридскиот ракомет има светла иднина.
Најпрецизен кај охриѓани беше Трифуноски со 5 постигнати гола, по четири дадоа Андоновски и Митрески.
М.П.
