Отворањето на фестивалот го проследија многу видни личности, како и учесниците на регионалниот претседателски самит чиј домаќин деновиве во Охрид беше претседателот на Македонија, Ѓорѓе Иванов, кој го означи официјалниот почеток на најзначајната културна манифестација во земјата.
– Сите патишта на сценската, вокалната и музичката уметност денес водат во Охрид. Во овие 40 дена, Охрид ќе биде духовно пристаниште кое низ уметноста ќе ги обединува луѓето и народите, нивното наследство, но и нивната иднина. Ова лето ќе биде во знакот на безвременото творештво на великаните како Бетовен, Моцарт и Бах. Ова лето публиката ќе има можност одново да ги доживее еврипидовите Електра и Медеја, да се соживее со шекспировите ликови, но и врвните современи драмски остварувања. Токму затоа Македонија е особено горда на фестивалот Охридско лето која низ годините стана втор дом на многу светски ѕвезди но и на ѕвезди во подем, истакна претседателот Иванов.
Музичкиот дел, кој и оваа година ќе доминира на фестивалот, нуди разновидна програма со многу новитети. Во Охрид годинава ќе гостуваат осумте тенори од Русија, наречени тенори на 21 век. Се издвојува и настапот на Најџел Кенеди, најпродаваниот виолинист на денешницата, а како своевиден спектакл се најавува заедничкиот настап на Влатко Стефаноски и Стефан Миленковиќ, на 2- ри август на Античкиот театар. На фестивалот оваа година ќе настапат и многу нови музички имиња.
Исклучително богата програма се најавува и во драмскиот дел. Предвидени се три премиери од македонска продукција- првата во изведба на Македонскиот национален театар кој ја подготвува претставата “Свадбата на Фигаро”. Втората премиера е “Кабаре мистериозо” во режија на Дејан Дамјановски, во изведба на Охридскиот театар, како и најновиот проект на Битолскиот театар, грандиозната претстава „Одисеј“ во режија на Александар Морфов, со која ќе биде затворен фестивалот. Содржините на фестивалот се збогатени со неколку уметнички изложби, а предвидена е и проекција на култниот македонски филм „Мирно лето“, кој е снимен пред 50 години.
Концертите и театарските претстави на 51-то Охридско лето ќе бидат изведувани на познатите сцени: Античкиот театар, црквата Света Софија и нејзиното предворје, отворената летна сцена Долни Сарај и Центарот за култура „Григор Прличев“.
