Одделението за локален економски развој и Канцеларијата за стручна поддршка на развојот на земјоделието при Секторот за туризам и локален економски развој на Општина Охрид, согласно својата стратегија за интензивирање на локалниоит економски развој, започнаа со реализација на едукативни работилници за можностите кои ги нудат новите измени на ИПАРД програмата ( 2007- 2013 ) .
Во рамки на активностите, во селото Куратица се одржа едукативна работилница наменета за жителите од селата Опеница, Завој, Плаќе, Речица и Свиништа, а во Долно Лакочереј едукативна работилница за жителите на селата Горно Лакочереј, Орман и населбата Радојца Новичиќ.
– Само на потегот од Опеница до Љубаништа граѓаните инвестираат во изградба или адаптација на голем број на објекти во делот на туристичко- угостителските услуги, а ниту еден од нив до сега не ги искористил поволностите што ги нуди оваа програма во мерката 302 за добивање на финансиски средства за кофинансирање на истите. Тоа е случај на целата територија на општината – истакна на средбите Горан Мицкоски од Секторот за туризам и локален економски развој.
Земјоделците, производителите на храна, инвеститорите во делот на руралниот туризам и угостителски капацитети, беа запознаени со можностите кои ги нуди ИПАРД програмата, начинот и условите на аплицирање и потребната документација за Јавниот повик 1/2014 кој ги опфаќа инвестициите на земјоделски стопанства за преструктуирање и надградба до стандардите на Европската Унија, инвестициите за преработка на земјоделски и рибни производи за преструктуирање и надградба до стандардите на Европската Унија и диверзификација и развој на рурални економски активности.
OhridNews
