По вчерашните тринаесетчасовни усогласувања, во еден часот по полноќ во Клубот на пратеници заврши состанокот на ад хок Комисијата која треба да ги расчисти настаните од 24-ти декември минатата година, во и пред Собранието, а двете страни брифираа за неподготвеноста на другата за преземање на одговорноста, пренесува „Макфакс“.

Според изворите на порталот Курир, од петочната расправа останале отворени уште неколку прашања, меѓутоа, опозициските претставници не биле подготвени да преземат одговорност, туку се обидувале целата вина да ја префрлат врз владејачката ВМРО-ДПМНЕ.

„Груба манипулација се тврдењата дека не било решено само прашањето за новинарите. Претседателот на Комисијата во оставка, Борче Давитковски, кој беше предложен од СДСМ, самиот истакна дека договор не може да се постигне по повеќе прашања. Само медиумите блиски до опозицијата го пренесоа брифингот на СДСМ и наведоа дека само новинарите се каменот кој ја сопна работата на Комисијата, што е целосна лага.“ – велат извори на порталот.

Претходно вчера доцна навечер пред изјавата на Давитковски, порталот Плусинфо објави дека не е постигната согласност поради неподготвеноста на ВМРО-ДПМНЕ да прифати формулација дека со отстранувањето на новинарите од собраниската галерија на 24-ти декември бил прекршен Уставот. Претходно, наводно, ВМРО-ДПМНЕ ги прифатила речиси сите формулации за одговорноста за случувањата во парламентот, вклучувајќи ја и оцената дека со насилното отстранување на пратениците од опозицијата бил прекршен Уставот. СДСМ без таква оцена не можел да го прифати извештајот.

Според најавите од саботата пред партиските реакции, сите опции остануваат отворени. Таква можност најави и претседателот на ад-хок комисијата за расветлување на споменатите настани во оставка на, Борче Давитковски кој за медиумите изјави дека и покрај вложените напори, некои прашања, сепак, останале отворени.

„Вложивме многу напори, но и покрај тоа неколку прашања останаа отворени. Ако претходно бев оптимист, веќе не сум. Сите отворени опции остануваат и ќе направиме напори прашањата што се отворени да ги затвориме во интерес на граѓаните.” – рече Давитковски.

Според анализата на порталот Курир, тврдењата дека останало отворено едно прашање биле само обид за алиби на СДСМ за непостигнување договор и „неуспешен обид за додворување до дел од новинарите, што впрочем била и стратегијата на СДСМ од самиот почеток. Најдобар сведок за ваквите информации можат да бидат претставниците на ЕУ во ад хок Комисијата“, пишува порталот и потсетува дека „голем број медиуми и аналитичари веќе претходно прогнозираа дека опозициската партија има за цел да ја блокира работата на Комисијата“.

Курир дознава и дека со ова бил исцрпен договорот меѓу лидерот на ВМРО-ДПМНЕ, Никола Груевски и претседателот на СДСМ, Зоран Заев, направен на почетокот од седмицава, кој предвидуваше прекин на разговорите доколку нема епилог до 24 часот во петок.

Од друга страна, претседателот на СДСМ Зоран Заев, во писмената изјава за медиумите истакна дека премиерот Никола Груевски ќе остане запаметен и како премиер кој на најдрзок можен начин го скрши Уставот на Република Македонија.

„Исполнувајки ја својата алчна потреба за пари за време на голема криза и сиромаштија, ВМРО-ДПМНЕ не сака да признае дека лани на 24 декември бил кршен и Уставот.“ – изјави денеска Зоран Заев, претседателот на опозициската партија по вчерашниот неуспех на Комисијата за расчистување на минатогодишните декемвриски случувања во Собранието на Македонија.

Членовите на Комисијата, Благородна Дулиќ и Илија Димовски од ВМРО-ДПМНЕ и Рената Десковска и Љубомир Фрчкоски од СДСМ, претседателот во оставка, Борче Давитковски и странскиот експерт Петер Ванхаусен одвчера попладне одржуваа состанок на кој присуствуваа и Мартин Протуѓер, шефот на Кабинет на премиерот Никола Груевски и заменик претседателот на СДСМ, Радмила Шекеринска.

Вчера беше последен ден кога ВМРО-ДПМНЕ и СДСМ, како што претходно договорија Груевски и Заев, требаше да ги усогласат ставовите и да изготват Извештај за случувањата во Собранието кога беше блокирана седницата на којашто требаше да се гласа за Буџетот за 2013 година.

Доколку не биде постигнат договор, нема да бидат исполнети условите од мартовскиот договор и со тоа ќе се загрози европската перспектива на земјава.

OhridNews

извор: „Макфакс“