По успешното прво преминување минатата година, оваа година „Со СУП преку граница“ се одржа по втор пат како маратонско СУП веслање на Охридското Езеро во должина од 30 километри. Настанот беше организиран од СУП Клуб Охрид, како дел од програмата на Фестивалот на водени спортови Охрид (Ohrid Water Festival).
Во веслањето учествуваа 30 веслачи со институционална поддршка од двете држави. Првиот ден веслачите ја поминаа релацијата Калишта – Лин, а вториот ден Љубаништа – Лагадин.
Централен момент беше симболичното преминување на границата од македонската на албанската страна на Охридското Езеро со даски за стоечко веслање, момент со кој се праќа порака за прекугранична соработка, за заедничка грижа за Охридското Езеро како природно наследство и за развој на одржлив и активен туризам на двата брега, посочуваат организаторите.
Фестивалот на водени спортови Охрид е манифестација посветена на Охридското Езеро и водата како заеднички ресурс, што низ спортски, еколошки и културни настани ја поврзува локалната заедница со гости од регионот и подига свест за зачувување на езерото.
„СУП преку граница“, додаваат организаторите, ќе остане настан што ги поврзува луѓето, спортот и езерото, без граници.
OhridNews
