Состојбата на Слатинско Езеро непроменета, дождот го зголемува свлечиштето на оштетената брана

Состојбата на оштетената брана на Слатинското Езеро е непроменета. Низ насипот од земја и камења се уште тече вода, но и натаму голем е приливот на вода во Езерото од Мраморечка река.

Според последните информации добиени од Дирекцијата за заштита и спасување – Охрид обилните врнежи од дожд кој наврна изминатата ноќ дополнително ја влошиле состојбата на оштетената брана, при што дошло до зголемување на свлечиштето. Оттаму состојбата ја оценуваат како сериозна, бидејќи доколку се спушти сртот на браната може да дојде до излевање на езерото.

Во текот на вчерашниот ден екипа на Регионалниот Центар за управување со кризи Охрид и претставници на Министерството за животна средина и просторно планирање извршија стручно согледување на оштетувањата и препорачаа да се изврши контролирано испуштање на вода од акумулацијата преку испустните цевководи. Дирекцијата за заштита и спасување од Охрид со свои екипи за интервенција пристапи кон отворање на клапните од цевководите и при тоа се ослбоди цевководот со пречник од 350 мм, а додека цевководот од 450 мм поради големиот талог немало технички можности да се отвори.

Количествата на вода кои истекуваат од браната се проценуваат на 4-5м3 /сек., што е приближно исто со дотекот во акумулацијата од Мраморечката река и изворите непосредно на брегот од акумулацијата. Вкупното оштетување на браната е со должина од 15-20 метри од круната на браната и со висина од околу 18 м и при тоа висината на земјениот насип во зоната на оштетувањето не е поголема од 1 м од страната на водата.

Како што информираа надлежните органи, најголема опасност доколку дојде до излевање на езерото има по земјоделските површини во атарот на селата Слатино, Слатински Чифлик и Издеглавје, а непосредна опасност има и на 4-5 куѓи во Слатински Чифлик, од каде е извршена евакуација на населението.

Состојбата будно ја следат претставници на општината Дебарца како и на СВР Охрид кои вршат обезбедување на самото место и поширокиот реон, конкретно на патниот правец од с.Издеглавје кон с.Слатински Чифлик и с.Слатино.