Охридските советници ќе донираат пари за помош на 18- годишната Ангела, која боледува од рак на коските и во среда мора да замине на операција во Виена- Австрија. Иако од страна на советникот Дејан Блажески беше предложено овие трошоци да се покријат со кратење на дел од хонорарот на советниците, беше утврдено дека тоа сепак не е правно издржано. Па затоа секој од советниците има можност да уплати средства на жиро- сметката за донации.
За помош на граѓаните, пред се на итните случаи, од локалната самоуправа најавуваат изготвување на правилник со кој ќе се регулира финансирањето на ваквите случаи.
– Случајот на Ангела не е единствениот. Кај нас секојдневно доаѓаат за помош бројни граѓани, сеуште ја бараме правната регулатива како да се изведе помагањето и секој граѓанин да има увид кои се критериумите за добивање помош , изјави секретарот на општина Охрид, Димитар Спасески.
