Управниот одбор на НУ Охридско лето на денеска одржаната седница посветена на усвојувањето на завршната сметка ја согледа целокупната финансиска состојба на Фестивалот и констатира дека националната установа е во солидна финансиска кондиција.
-НУ Охридско лето има одредени обврски кон доверители кои се реализираат според договорената динамика и нивната исплата ќе се заврши во текот на предвидениот временски рок, а истите воопшто не ги доведуваат во прашање редовните активности, односно работењето на установата, особено што предвидените приходи неколку пати ги надминуваат обврските кои Фестивалот ги има во моментов.-информираат од УО на Охридско лето.
Колкави се тие долгови односно предвидени приходи во бројки, од фестивалската управа не соопштуваат, затоа што, како што велат законски немаат такво овластување.
Од УО тврдат дека долговите не се шестцифрени изразени во евра и дека Охридско лето ќе ги подмири своиоте обврски, како што тоа го има направено со уметниците кои настапиле на фестивалот, а кои, како што се посочува во целост се исплатени.
Како што е познато, по оставката на директорот Васко Василески и повлекувањето на новоназначените програмски селектори Министерството за култура ја назначи в.д. директор Анита Алоска од редот на вработените во установата, а во меѓувреме распиша конкурс за избор на нов директор по скратена постапка. Се очекува за десетина дена Охридско лето да има нов раководител кој согласно статутот ќе ги избере и новите селектори, на кои им преостануваат само 4 месеци да го подготват 52 издание на фестивалот.
OhridNews
