Екипата на Охрид Лоте попладнево од СРЦ Билјанини Извори ќе замине за Струмица , каде утре во рамките на шестата рунда од Втората МФЛ, ќе и гостува на Беласица.
“Градежниците“ се одлучија на ваков потег со цел да бидат што подобро подготвени за мечот од кој се надеваат да се вратат со цел плен.
– Нас не интересираат трите бода и на секој натпревар одиме на победа, без разлика дали играме дома или играме на гости. Ја респектираме екипата на Беласица, но наша желба е да победи фудбалот. Посакуваме фер судење и во една фудбалска атмосфера да победи подобриот – вели Триуфноски , кој поради суспензијата мечот ќе го води од трибините на стадионот Младост.
Одбранбените фудбалери Велкоски и Стојаноски ги санираа повредите и се очекува да бидат меѓу стартните 11 на мечот против Беласица во Струмица. На располагање на Трифуноски се и Димоски и Абди кои ја одлежаа суспензијата.
“Градежниците“ по пет одиграни кола се наоаѓаат на четвртото место со десет освоени бода. Со 11 постигнати погодоци го имаат најефикасниот напад во втората фудбалска лига.
Нивниот противник се уште нема славено на домашен терен и со четири бода се наоѓа на 11. место на табелата, во последните три гола не успеаале да ја затресат противничката мрежа.
М.П.
