Светот го одбележува 3 Мај, Меѓународниот ден на слободата на медиумите. Македонија не го одбележува. Затоа што нема што да одбележува. Ова е ставот на Самостојниот синдикат на новинарите во Македонија (ССНМ), по повод денешниот Светски ден на слободата на медиумите.

„Ако се даде акцент на овој важен ден, тогаш ќе мора да се каже дека новинарите и медиумските работници мораат да работат без страв од одмазда, без закани и насилство, без корупција и уцени… А сите оние што работат во медиумите знаат: во една држава во која во континуитет се затвораат медиуми, во која се затвораат новинари поради вршење на својата работа, во која се пресудуваат бесмислено високи казни за навреда и клевета, во која има неразјаснети погибии  на новинари… тоа, едноставно, не може да се каже“, велат од ССНМ.

Слободата на изразувањето и правото да се информира и да се биде информиран, се наведува во писмената изјава на ССНМ, се фундаменталните права врз кои се темели секое демократско општество, а извештаите на сите релевантни и помалку релевантни домашни и меѓународни организации што се занимаваат со овие прашања ја лоцираат Македонија на дното по почитувањето на овие права. „Ваквата проценка може да значи само едно – Македонија е далеку од демократско општество“, нагласуваат од новинарскиот синдикат.

„Заштитата на новинарите, безбедноста на новинарските работни места и укинувањето на „деликтот на мислење“ се далечни поими во земја во која владее цензурата и самоцензурата, каде што говорот на омраза не само што поминува неказнето, туку и се стимулира, каде што политичките и економските центри на моќ ги диктираат уредувачките политики, каде што постои нетранспарентност врз сопственичките структури на медиумите, каде што владеачката политичка елита е неселективно заштитена од критичкиот збор…Затоа 3 Мај, денот што повеќе од две децении светот и’ го посветува на слободата на медиумите е можност и новинарите во Македонија да потсетат дека не постои слобода без слобода на медиуми, дека не постои демократија без судир на мислења, дека новинарството е една од најбитните професии во изградбата на демократските капацитети“, наведува ССНМ по повод 3 Мај – Денот на слободата на медиумите.

OhridNews

„Макфакс“