Вицепремиерот и министер за финансии Зоран Ставрески изрази уверување дека со денешното стапување во сила на законот за финансиска дисциплина ќе се подобри ликвидноста и конкурентноста на македонското стопанство. Ставрески појасни дека новиот закон, бил донесен по барање на домашните фирми за воведување на рокови за плаќање на обврските меѓу субјектите од приватниот сектор, но и кога станува збор за субјекти приватниот сектор кои работат со државата.
„Со воведувањето на стриктни рокови како и обврската да се плаќа во предвидените рокови и предвидувањето на плаќање прекршочна казна и камата ако се отстапи од тие рокови, очекувам дека ќе се прекине практиката на неплаќање на обврските што го правеа и некои фирми кои што имаа добра ликвидност и на некој начин се создаде една култура на неплаќање на обврските. Тоа не е добро за една пазарна економија и за едно функционално домашно стопанство и голем број на фирми се жалеа од таа ситуација и бараа да се изнајдат инструменти со кои тоа ќе се прекине. Токму со законот за финансиска дисциплина излегуваме во пресрет на тие барања“, рече Ставрески.
Тој наведе дека ваква практика се применува во државите членки на Европската унија.
OhridNews
извор Макфакс
