„Светило на врв планина“ е насловено првото илустрирано житие за Света Спаса Вишенска. Станува збор за прво адаптирано житие за деца на македонски светител чиј автор е писателката Јасмина Кантарџиева Димков, а илустратор Викторија Попоска.
Житието, како што појасни уредникот на книгата отец Александар Димоски на промоцијата, се состои од седум поглавја, со по два цртежи или вкупно четиринаесет цртежи.
Иницијативата произлезе на минатогодишната прослава на Света Спаса Вишенска во разговор со авторката да го адаптираме житието на Света Спаса да биде достапно и разбирливо за деца. Житието е опширно, но од разговорот со авторката произлезе идеја да се скрати и да се доближи до децата, истакна Димоски.
Авторката посочи дека житието е создадено да биде разбирливо и инспиративно за најмладите, но и вредно четиво за возрасните.
Промоцијата на „Светило на врв планина“ ја потврди важноста од создавање современи и визуелно привлечни дела, кои го оживуваат духовното и културното наследство на нашата земја, а одѕивот од публиката сведочи за зголемениот интерес кај јавноста за духовна литература наменета за најмладите, истакна Кантарџиева Димков.
Промотори на делото беа писателката Верицa Мукоска и отец Александар Крстаноски, кои ја истакнаа потребата и значењето од вакви изданија за духовно оформување на децата и запознавање со историските вредности на земјата.
Промоцијата се одржа на 25 мај, денот кога првпат беа прославени светите исповедници Спасе Вевчански и Спаса Вишенска, по нивната минатогодишна канонизација од страна на Светиот архиерејски синод на МПЦ-ОА.
OhridNews
фото. А. Момироска
