Бројот на новодијагностицирани пациенти со мултипла склероза постојано расте, бидејќи секоја година се дијагностицираат нови 80 до 120 пациенти, а повеќе од 50 пациенти се на листата на чекање за примање на високоефикасна терапија, посочи претседателката на Националното здружение за МС, Ана Карајанова Димитрушева, на денешното одбележување на 30 мај – Светскиот ден на лицата со мултипла склероза.

Лицата кои се на листата за чекање за терапија, Карајанова Димитрушева вели дека се млади, работоспособни и сè уште можат да го дадат својот придонес во општеството, но ако останат и понатаму без терапија, постои ризик за прогресија и појава на неповратен инвалидитет.

Ваквата состојба ќе се рефлектира со значителен товар врз самиот пациент и неговото семејство, а претставува и сериозна импликација и негативен економски импакт врз социјалниот, здравствениот и пензискиот фонд во подолг временски период, додава таа.

На настанот присуствуваше и сопругата на претседателот Стево Пендаровски, проф. д-р Елизабета Ѓорѓиевска која во своето обраќање посочи дека пациентите со мултипла склероза се во постојана неизвеснот и борба, но благодарение на усовршената терапија забележано е значително подобрување.

Од мултипла склероза во светот боледуваат околу три милиони лица, меѓу кои околу 1500 наши граѓани, што не прави земја со висок ризик. Специфично е што болеста е повеќе проширена кај женската популација. Иако е дијагностицирана пред повеќе од илјада години, главниот причинител за болеста сè уште не е познат и за жал, сè уште не постои лек за мултипла склероза, истакна Ѓорѓиевска.

Таа порача дека покрај терапијата со лекови, суштинска е и психолошката помош и како општество, треба да придонесеме за благосостојбата на лицата со мултипла склероза.

Заменик-министерот за здравство, Владимир Рендевски порача дека треба да се направат акции и фокусот да се стави на раното откривање на мултипла склероза, пред сè со поголеми и поактивни промотивни настани, обуки, како и кај граѓаните, така и кај лекарите.

  • Колку порано се детектира оваа болест толку се помали и последиците. Се согласувам со тоа дека современиот третман и терапијата овозможуваат се подобар и полесен тек на болеста, така што како држава и како Министерство за здравство даваме апсолутна поддршка и напори за современата терапија да биде што подостапна кај сите пациенти, бидејќи тоа ни е должност, додаде Рендевски.
  • MS „Connestions“ – „МС Поврзувања“ кое годинава е околу поврзувањата на лицата со МС во заедницата и во општеството. Со мотото „I connect, We connect“ – „Заедно поврзани“ #MSConnections, ги предизвикуваме социјалните бариери кои предизвикуваат изолација и осаменост за лицата со МС, велат од Националното здружение за МС.

Оттаму додаваат дека оваа кампања се спроведува се со цел да се подигне свеста за невидливите симптоми на МС и нивното негативно влијание врз квалитетот на живот на лицата кои се соочуваат со оваа болест, да ги предизвикаат општите заблуди и да им помогнат на луѓето да размислат како да им понудат соодветна поддршка. На тој начин општата јавност ќе се запознае со големиот број на исцрпувачки симптоми со кои секојдневно се соочуваат лицата со МС, а општата јавност не ги гледа.

OhridNews