Денеска се обележува Светскиот ден на слободата на медиумите. Овој ден пред 19 години го востановила Организацијата на обединетите нации по препорака на УНЕСКО. Оттогаш на овој ден се дава оценка за состојбата на медиумските работници во светот, за тоа дали и колку медиумите се независни во вршењето на својата работа, а им се оддава и почит на новинарите кои го загубиле животот вршејќи ја професионалната должност.
На 3-ти мај граѓаните имаат можност да се информираат каде има повреда на медиумските слободи, за тоа дека во одредени земји постои цензура, казна и затворање на медиумите, а новинарите неосновано се апсат, затвораат или убиваат. Денеска е ден-потсетник за владите низ целиот свет дека треба да го почитуваат ова право на кое се обврзале, но и ден кога самите медиумски професионалци треба да се потсетат на нивната должност за примена на етичките стандарди.
Токму затоа, на овој ден бројни медиумски здруженија и институции организираат низа настани за одбележување на овој ден, излегуваат со соопштенија со оцена на слободата на медиумите во сите земји и региони.
