Охрид во летниот период, ќе биде домаќин на двонеделен „Летен камп“ наменет за талентирани средношколци. На кампот, на кој ќе учествуваат 45 ученици од земјава, предавањата ќе ги изведуваат Машинскиот, Технолошко – металуршкиот и Факултетот за информатички науки и компјутерско инженерство, чија програма е специјално дизајнирана за потребите на средношколците.

Наставата ќе се одржува во текот на работните денови со по седум часови дневно, односно, дополнителни два за викендот. Учениците од понудените предмети, ќе можат да изберат само еден, а секоја од трите групи ќе биде составена од 15 средношколци. Според Министерот за образование  и наука Панче Кралев, проектот има за цел да ги идентификува и пронајде талентираните ученици, со цел развивање на вештинит и интересите кои ги имаат.

„Минатата година имавме проект, преку кој четири средношколци поминаа три недели на Универзитетот Џон Хопкинс во САД.  Со помош на нашите факултети, ќе им се обезбеди соодветна настава од научно-истражувачки карактер на талентираните средношколци.“ – изјави ресорниот министер, на денешната промоција на проектот на Технолошко-металуршкиот факултет.

За учество на кампот, во следниот период ќе се објави оглас, на кој ќе можат да аплицираат ученици од прва, втора и трета година до средните училишта, кои имаат значителни достигнувања во полето на математика, физика, хемија, биологија и информатика. Селекцијата ќе ја прават самите факултети во соработка со министерството, а изготвени се соодветни упатства и правилници за идентификација на овие ученици.

OhridNews