Пред почетокот на новата учебна 2025/2026 година 20-те првачиња од ООУ Дебрца денес беа на свечен прием кај градоначалникот Зоран Ногачески.
Посакувајќи им топло добредојде во светот на знаењата, на првачињата им доделив училишен прибор, кој традиционално го донира фондацијата „Капинков“ на Драган Капинков, бизнисмен од Перт, Австралија, родум од битолското село Цапари. Пред првачињата и родителите уште еднаш ја потенцирав заложбата дека како локална самоуправа, постојано ќе вложуваме во училишната инфраструктура, во наставниот кадар и мотивирани ученици, се со цел учениците во општина Дебрца да бидат меѓу најдобрите, вели Ногачески.
Посочува дека и оваа година општина Дебрца на сите првачиња ќе им додели еднократна парична помош по 5.000 денари.
Воедно изразува благодарност до фондацијата „Капинков“ на Драган Капинков и до почесниот конзул на Република Македонија во Перт, Зоран Ќосески, по чија иницијатива, вели, фондацијата од 2013 година непрекинато пред почетокот на секоја учебна година доделува училишен прибор за првачињата од општина Дебрца. Додава дека оваа година подароци за првачињата донираа и Министерството за образование и наука и Комерцијална банка АД Скопје.
OhridNews
