Градоначалникот на Охрид да ја прекине апсурдната серија на молење на министерството за нешто за што самото постапува, наместо тоа да се концентрира на обврските коишто ги има за уредување на хаосот во неговата општина, затоа што граѓаните тоа го очекуваат од него, се вели во реакцијата на Министерството за транспорт и врски во врска со денеска одржаниот прес на Александар Петрески, кој уште еднаш побара најитно да биде поставен капетан во Охридската капетанија.
Ја потсетуваме јавноста дека постапката за избор и именување на Капетан е отпочната и во најкраток временски период ќе биде поставено лице кое ќе ја извршува оваа должност. Ја информираме јавноста дека Капетанијата на пристаништа во Охрид функционира со полниот капацитет и континуирано во соработка со Министерството за внатрешни работи – Езерска полиција, врши редовни контроли во однос на почитувањето на законските прописи. Исто така, од страна на Министерот Јанакиески беа донесени посебни овластувања и назначени лица во Капетанијата кои ќе ја извршуваат работата во однос на различни задачи се до назначување на нов Капетан, стои во соопштението.
Во насока на безбедност во езерскиот сообраќај, вчера воведена беше одлука за ограничување на пловидбата за пловните објекти на Охридското, Преспанското и Дојранското езеро. Забраната се однесува на пловните објекти “скутери” кои се со јачина поголема од 45 Кw кои можат да пренесуваат максимум 3 лица. Ограничувањето важи за периодот од 11.00 до 18.00 часот секој ден и важи за целата водена површина на Охридското, Дојранското и Преспанското Езеро, а истата е донесена за заштита на граѓаните и сите домашни и странски посетители на езерата, односно поголема безбедност на капачите и заштита на животната средина на природните езера и истата не се однесува само на скутерите кои се наменети за службени потреби за вршење на инспекциски, царински и полициски надзор, информираат од Министерството за транспорт и врски.
OhridNews
