Три четвртини од семејствата во Македонија со месечниот буџет можат само да си дозволат да купат храна и да ги покријат сметките за домување, покажува телефонската анекта на Институтот за социјална демократија „Прогрес“, пренесува „Макфакс“.
На прашањето што може вашето семејство да си дозволи со месечните примања, 27,9 отсто од испитаниците одговориле дека можат да си купат само храна, 46,8 отсто можат да си купат храна и да платат сметки за домување, 18 отсто храна, сметки и неопходни производи, а 5,4 отсто можат да си дозволат се што сакаат.
Повеќе од половина од граѓаните сметаат дека власта го троши буџетот во своја корист, а не во корист на граѓаните.
На прашањето дали власта го троши државниот буџет во корист на граѓаните или во своја корист, 18,5 отсто одговориле дека буџетот се троши во корист на граѓаните, а 54,2 отсто дека владата го троши буџетот во своја корист.
Две третини од граѓаните сметаат дека Владата лошо се справува со сиромаштијата и невработеноста.
На прашањето како Владата се справува со сиромаштијата и невработеноста, 21,1 отсто одговориле „добро“, а 64,5 отсто одговирле „лошо“.
Анкетата е спроведена на национално ниво, а опфатени биле 1116 испитаници.
