Според проектот содржан во изборната програма, предвидено е реализацијата да се одвива во пет фази.
Во првата фаза ќе бидат опфатени повеќе јавни, образовни и административни институции во центарот на градот, меѓу кои гимназијата, ОУ „Григор Прличев“, централната детска градинка, средното Економско училиште, општинската зграда, како и домаќинства кои живеат во овој дел од градот. Првата фаза од проектот е предвидено да заврши до почетокот на грејната сезона оваа година.
– Во втората фаза е опфатена гасификација на јавни, образовни и административни институции и домаќинства во населбите Христо Узунов и Даме Груев, а во третата фаза ќе бидат опфатени комплексот СЦ Билјанини извори, со опфат на крајбрежниот појас , населбата Охридати, со можност за проширување кон хотелско- туристичките капацитети, рече кандидатот за член на советот на општина Охрид, Томислав Тинтев.
Во четвртата и петтата фаза се предвидува гасификација во населбата Билјанини извори и населбите Горна Влашка маала, Крст- џамија, Лескајца, Воска.
Според проектот, реализацијата на петтата фаза ќе заврши до крајот на грејната сезона во 2017 година.
Како што нагласи Тунтев, со гасификацијата ќе се овозможи заштеда на околу 70% од средствата кои претходно се трошеле за набавка на нафта за греење за институциите.
Вкупната инвестиција за реализација на петте фази од проектот е еден милион евра.
