Агенцијата за промоција и поддршка на туризмот учествува на туристичкиот саем во Ниш, Србија со сопствен изложбен простор на кој се презентираат туристичките капацитети и можности кои ги нуди земјава.
Македонската понуда е насочена кон богатата култура, вински туризам, гастрономија, убавините на Охрид, Дојран и Југоисточниот регион, алтернативни форми на туризам, а се во интерес на српскиот туристички пазар.
Во духот на добрососедство и подобрување на работната клима што е предуслов за развој на туристичкиот сектор, Агенцијата за промоција и поддршка на туризмот на Македонија на саемот во Ниш, Србија покажува дека е отворена за соработка и размена на искуства со чинителите од српскиот и регионалниот туристички пазар. Српските туристи со во првите пет странски посетители во Македонија со вкупно остварени 72 338 туристички посети и релизирани 138 664 ноќевања за 2024 гoдина, предвидувањата се исти и за оваа туристичка сезона, потенцира директорката на АППТ, Стефаноска.
Туристичката организација Ниш, под покровителство на Град Ниш, го организира 25. Меѓународен саем за туризам во периодот од 4 до 6 април 2025.
Меѓународниот саем за туризам во Ниш е место кое долги години ги собира на едно место сите актери на туристичката индустрија од целиот балкански регион. Идејата е да се собере и поврзе туристичката понуда на регионалните дестинации на едно место, со побарувачката од европските и балканските тур-оператори, а Ниш за време на Меѓународниот саем за туризам да стане место кое ги поврзува Истокот и Западот.
OhridNews
