Дванаесет ученици од РЦСОО „Ванчо Питошески“ – Охрид предводени од координаторите на проектот „A BRIDGE CONNECTING TWO LAKES“ психолог Даница Скрческа и наставник Сања Митаноска беа во посета на Бор, Република Србија. Проектот е еден од 45-те избрани најдобри проекти изработен во соработка меѓу РЦСОО „Ванчо Питошески“ – Охрид и „УЧИЛИШТЕ ЗА ЕКОНОМИЈА И ТРГОВИЈА“ – БОР, Република Србија, информираат од училиштето.
Деновите поминати во Бор беа исполнети со учење, соработка, дружење и пријателство. Првиот ден започнавме со меѓусебно запознавање и работилници за Младински активизам, каде што споделувавме идеи и заеднички креиравме решение за позитивни промени во нашите заедница. Вториот ден беше посветен на гастрономските традиции на нашите краишта, со дегустација на јадења и размена на приказни кои ги придружуваат. Попладневните активности беа обележани со теми на националните малцинства во Бор, нагласувајќи ја важноста на меѓукултурниот дијалог и разбирање, велат.
Третиот ден, додаваат, учениците ги истражуваа природните убавини и традиции на руралните области на Бор, а особено беше истакната улогата на туристичките техничари од училиштето од Бор кои ги претставија локалитетите што ги посетивме.
Четвртиот ден учениците креираа и спроведоа анкета за меѓукултурен дијалог, анализираа фотографии во рамките на фото-игра и ги споделија своите впечатоци со локалните медиуми.
Петтиот ден на дружење меѓу учениците помина во анализа на резултатите од анкетата и се креираа планови за идна соработка преку on-line клуб,,Мостови“ @club_bridges , кој беше создаден од учениците пред да се остварат средбите.
Во знак на трајно сеќавање на ова искуство засадивме дрво на пријателство пред училиштето, а вечерта беше резервирана за вежбање на заедничка песна која заедно ја дизајниравме и за меѓусебно и убаво дружење. Втората размена на учениците ќе биде во Охрид, на која ние ќе бидеме домаќини, а ќе се одвива во период од 23 март-29 март 2025 година, додаваат од училиштето.
OhridNews
