Ученици од СОУ „Св. Климент Охридски“ – Охрид дел од мултимедијален проект „Светлосни приказни“ што ја истражува врската меѓу уметноста, технологијата и светлината преку современи дигитални и AI алатки.
Создадените сопствени визуелните решенија од учениците на одржаната претходна работилница ќе бидат прикажани вечерва на финалната изложба „Светлосни приказни“ од авторите Софија Грабулоска, Дарко Талески, Кристијан Томан во Центарот за култура „Браќа Миладиновци“ – Струга со почеток во 20 часот.
Нашите ученици со своите дела ќе бидат дел од оваа уникатна поставка, што претставува вредно искуство и поттик за нивниот понатамошен уметнички и личен развој. Со вакви проекти, гимназијата „Св. Климент Охридски“ продолжува да ги поддржува иницијативите кои ги спојуваат образованието, креативноста и современите технологии, подготвувајќи ги младите за иднината во која уметноста и науката се надополнуваат и инспирираат една со друга, велат од училиштето.
Од Центарот за култура „Браќа Миладиновци“ – Струга посочуваат дека преку изложбата просторот ќе се претвори во живо платно, каде архитектурата, светлината и движењето комуницираат како едно дело и во оваа изложба, цртежот станува светлина, а светлината – приказна.
Со помош на видео-мапирање и дигитални анимации, ѕидовите на просторот се трансформираат во активен учесник на уметничкиот чин – место каде што светлината не само што осветлува, туку и создава. Преку процес на цртање, снимање, дигитализација и светлосна проекција, младите учесници имаа можност да го искусат патот на едно дело – од линија на хартија до светлосна форма во просторот. Покрај делата на учениците, уметниците Грабулоска, Талески и Томан создаваат сопствени светлосни и дигитални композиции, кои заедно со ученичките работи се спојуваат во едно единствено дело. Оваа колективна композиција не постои како низа одделни дела, туку како единствен уметнички организам што живее, дише и комуницира во просторот. Секоја проекција, секој фрагмент од светлина е дел од поголема целина – визуелна симфонија во која линијата, бојата, архитектурата и технологијата пулсираат во заеднички ритам, посочуваат.
Додаваат дека „Светлосни приказни“ ја отвора можноста да се почувствува нова форма на културна комуникација, каде човечката имагинација и технолошката иновација не се во спротивност, туку дишат заедно – создавајќи мост меѓу генерации, медиуми и сетила.
OhridNews
